2014年10月8日星期三

一蟹勁過一蟹 - 方卓如

2014年10月8日 - 信報

香港出過3個特首,一蟹不如一蟹,最令人懷念嘅原來係董伯伯。佢老人家退出江湖尤自可,最近佢又活躍台前,咁就最應該請佢老人家出手擺平佔領運動。佢係習主席嘅親信,一齊去美國出訪,又係特首嘅恩師,一手提攜。唔單止可以向上反映真實民意,以正視聽,又可以親自當面叫特首搵個解決方案袋住先,化解危機。原本都唔敢煩佢老人家,但既然佢自己都撲出嚟,就唔該佢做番件啱嘅事,搵啱人去勸。

呢班學聯嘅學生,廿歲仔,點解咁勁?你睇佢哋同政府開會商討對話細節,之後開記招,個樣好有自信,講嘢有紋有路。睇佢哋嘅做法,清醒過人,淨係開會要喺港大唔喺政府總部,避免人家有種入內面聖的感覺,就比當年民主黨去中聯辦傾有智慧好多。

學生心態成熟過大人

若果唔係天生就係一個骨格精奇嘅練武奇才,咁一定係佢哋嘅成長過程有嘢或有人教曉佢哋咁多嘢。

佢哋呢一代應該係打機打大,應該係對住個電腦熒幕多過真人,唔搞到變宅男已經偷笑,何來咁識淡定面對記者?睇嚟而家啲後生仔絕對唔係我哋啲老鬼可以明白,而且佢哋日日浸淫喺互聯網嘅世界,真係有本事快速學習到一啲我哋以前成半世人連接觸機會都冇嘅事物。只可以講一句,用我哋當年後生時候係點而衡量佢哋,就會變成錯判形勢。今次有辦你睇,後生仔行得前過任何人,心態亦成熟過好多大人。

所以,特首就一蟹不如一蟹,但學生就一蟹勁過一蟹。時間喺佢哋嗰邊,同佢哋磨,鬥長命,你輸梗。

沒有留言:

發佈留言