2014年10月8日星期三

真係潛咗水 - 方卓如

2014年10月1日 - 信報

好多人會問,點收科?同以前唔同,今次香港人走出來要求的事情,唔係香港自己話事。七一遊行、大家出來反二十三條,最後唔係政府唔想做,只不過香港人田北俊轉軚,救咗香港,但係佢之後都唔好受。反國教,目標係國民教育,撤回唔撤回,純粹香港自己嘅事。做唔成,係香港政府自己難睇。

今次咁多人走出嚟嘅要求,係乜?真係唔知。整體嚟講要自由,要真普選。好多人係因為睇唔過眼政府用催淚彈,企出嚟抗議。有人因此而要梁振英下台,又有人話梁振英落台都冇用,冇民主點都會有梁振英二號,所以要人大撤回決定,重啟政改諮詢。咁多唔同要求,唔使熟悉中國歷史,一睇就知唔會畀到你。最後兩樣,都唔係自己香港話事。

今次訴求 非港府能話事

最弊而家冇人可以做頭,領導到走出嚟的市民。而家已經唔係佔中咁簡單,啲催淚彈將積累多年嘅民怨一次過迫出嚟,唔係佔中搞手有本事叫咁多人放工放學後出嚟企,出嚟瞓街。佢哋想叫停都冇本事,邊個會聽佢哋講?而家有本事叫人散去嘅,就係政府。但係要政府做啲嘢令市民順氣,肯撤退,呢個政府唔會。政府唔需要叫人叫停佔領,你自己出嚟搞掂番個殘局。

噚日好多人打鑼搵我,以為我潛咗水,其實我真係去咗潛水。我遇到德國人、奧地利人,個個都問我香港而家乜嘢事。香港而家真係變咗世界大事,我希望同二十五年前唔同。香港唔係搞緊革命,只係想要個公義社會,好卑微。

沒有留言:

發佈留言