別等一個人咖啡 - 方卓如

2014年9月12日 - 信報

香港愈來愈多咖啡店，其中仲係好多由小本經營開始，一間兩間慢慢開，由沖咖啡做埋炒豆，呢啲小店，我哋要多加支持。

咖啡店應該係熱血青年最有能力殺出血路的店舖。你諗吓，喺香港做乜生意都死的環境下，開舖，你可以開乜？時裝店？Greenpeace的時代完結咗，買靚衫，店舖鬥唔過淘寶。賣書？賣傢俬？賣電器？諗都唔使諗。開餐館？本大，未回本已經加租。賣咖啡係仍然可以開舖的唯一選擇。去餐館，六十蚊碟飯你會嫌貴，但一間精品咖啡店，六十蚊一杯咖啡你會覺得抵。究竟碟飯成本高還是杯咖啡成本貴……我冇答案，但肯定熱血青年沖一杯咖啡，拉一個花，型過拿起鑊鏟起勢炒。

咖啡店不用location

咖啡店喺咁多種開舖事業中，最唔需要location。你會找尋隱世的極品型格咖啡店，每個月總想去一兩次，但絕少找尋偏僻的時裝店、電器舖或書局。餐廳你都可能會捐窿捐罅，但一世人只會去一兩次，好難長期攀山涉水幫襯。只要唔使location，租就可以平啲，熱血青年就可以捱耐啲，做大啲嘅機會又會大增。

做好一間咖啡店，唔難。杯咖啡好飲，已經攞咗八十分。唔好睇小杯咖啡，好飲唔好飲，好易分。好飲嘅，真係會上癮，真係會第二度飲唔番。要杯咖啡好飲，唔使鬥錢多，真係鬥手藝同品味，用你對手同條脷就得。呢兩樣嘢，係人都有，用啲心機就得，熱血青年有優勢。

咖啡店仲有一樣好處，唔使裝修太靚。你睇外國啲咖啡店，甩甩漏漏，個個穿晒耳、紋晒身，傢俬買一件執兩件，有型有款，搞掂。

太工整的舖面，冇味道。舖亦唔需要大，太過空洞的咖啡店，好似殮房一樣，毫無人氣，裝修幾靚都冇人入。細細地、迫迫地，帶點喧嘩，型男索女，互相調笑。那邊一個文藝青年用MacBook 做功課，這邊一隻小狗在懶洋洋半睡半醒，咁就為之very good。

睇到呢度，你都有啲口渴。個市唔郁，別等，落去搵間小店，買杯double ristretto latte飲吓，我請。