十大職業之首 - 方卓如

2014年9月23日 - 信報

十大女士理想對象的職業，排首名的是銀行家，這要拜各大傳媒所賜。銀行家有這樣的地位，必定有其原因。薪水較高相信係其中一大原因，千祈唔好覺得女士以工作為擇偶條件，大家就話現實、勢利，其實跟男士以外表漂亮為擇偶條件一樣。男士以貌取人，是非常原始的自然反應，女士以人工即搵食能力揀人，自人類出現以來都一樣。男士怕第時自己冇錢會被人拋棄，女士亦怕將來年老色衰，配偶變心一樣。所以毋須掩飾，人工高多人鍾意，天公地道。

銀行家除了人工可能較高之外，其他可能是幻象。銀行家的工作一啲刺激樂趣都冇，近乎可以用枯燥來形容。他們好可能是PowerPoint高手，日常工作就是製作不同的PowerPoint。這與他們學生年代做功課其實近似，係唯一學以致用的項目。他們好快手，聽完古仔之後識得點樣present，改完又改，這份就是他們最實在的貢獻。

銀行家頻出差　眼光未必闊

他們出差頻密，但大多數是坐車往來酒店、客戶辦公室、機場。他們可能到過許多城市，但眼光其實不離電腦同電郵。唔好以為他們經常出外公幹就眼光廣闊，隨時唔及你跟旅行社七天去十國見到咁多嘢。另外，他們的工作時間大多數花在conference call。你無法想像，既然大多時候，都是將電話校成靜音，唔需要出聲，齋聽都有咁多電話要講。他要到時到候，答上兩句嘴，以示自己在場。其餘時候，帶earphone做自己嘢。人生，花在毫無價值的電話上，他們比任何人都多。

十大職業之首，拆開了就是如此生涯，最重要還是那張卡片。他們的卡片，是身份證。沒有卡片之後，剩下兩種人。一種，唔係任何一個人，nobody，冇人會記得，打電話冇人接。另一種，做了另一行完全唔同嘅行業，非常成功。而人家介紹他的時候，會說他是前銀行家。