做交易要武功高強 - 方卓如

2014年9月18日 - 信報

香港本來係買辦城市，但而家最難做竟然係買辦。當年嘅買辦即係而家嘅中介或經紀。以前買辦之所以能夠立足，因為識講英文，咁咪可以做中介囉。而家嘅經紀，最值租梗係識得人多，同埋資訊消息夠多。但去到而家，太透明，而且產品又多，做買辦即刻冇晒神秘感。賣車賣樓賣股票，個個都捱到金晴火眼。

賣車原來最慘。股票可以印，樓可以起，但車一定係買，買人架車再賣。賣車，畀廠夾，畀業主蝦，畀對手迫。想賺多啲錢嘅唯一方法，就係賣多啲車，成本一定冇得減。

又或者喺service到再斬多啲，斬你一頸血。喺香港，做經紀做sales，要識揀賣乜。

最緊要頭腦清醒

做交易最緊要係乜？最緊要頭腦清醒，知道自己要乜，同自己最緊張係乜。點解？因為做交易過程，大把人喺你耳仔講東講西，噏三噏四。你唔知自己要乜，耳仔軟，隨時死咗唔知乜嘢事。做交易個阿頭，一定要係武功最高嗰個，冇得走。所以唔好羨慕做交易好似好好玩，又刺激，又賺錢。要武功高強，唔係個個都得。

我師傅武功高強唔在講，我見其他師傅級人馬，個個都係識嘢最多嗰個。你唔會大到佢，你唔會bullshit到佢，你亦唔會瞞到佢。所以只有佢哋贏，絕對唔會輸。呢一行係最均真嘅一行，賺錢最多嗰個，一定係最真材實料。

喺西方國家，搞政治嘅一定係最叻嗰批人，識最多嘢。喺香港，最叻嗰批人，一定唔係搞政治，仲係愈叻愈低調。所以話，香港真係唔可以照搬西方嗰套。

如果你睇得美劇多，以為搞政治就可以發揮自己嘅智慧，死咗都唔知乜嘢事。