2014年9月24日星期三

有11號咪無咁勞氣 - 方卓如

2014年9月4日 - 信報

好多人誤會親建制人士一定冇受任何中港矛盾影響,生活喺comfort zone,不知民間疾苦,何不食肉糜。所以佢哋對香港變成唔係香港毫無切膚之痛,講說話一啲都唔以香港利益出發。篩選又ok,割地又ok,總之就係收咗jetso,捫住良心講嘢。

我唔排除有啲喪心病狂嘅人,但係咁樣以偏概全就會誤判,其實呢班人裏面身受中港矛盾痛苦嘅人不知幾多,隨時多過要同人爭奶粉嘅屋邨媽咪。做生意嘅,唔使講,佢哋受內地人氣,被內地人昆嘅機會,大過佔中三子一萬倍。佢哋每日接觸唔同嘅大陸老闆,個個據稱都有錢過自己幾十倍,雖然計資產淨值隨時唔夠一個太古城有樓嘅中環打工仔。但你咪理,總之佢未爆煲或被拉前,佢都係有錢人,你同佢做生意就要睇佢面色。

主動派中環人諗計生存

你問吓中環,嗰啲精過鬼嘅香港老細有幾多人畀大陸人呃走半份身家?佢哋想追番都追唔到,佢哋受中港矛盾嘅禍害直情傷到入肉。但佢哋唔會佔中,生活得好鬼積極,主動派會諗點樣唔再受騙,超級主動派就會諗點樣呃番佢哋轉頭。

中環打工嘅中產精英,每日都係中港矛盾。佢哋每天都是幻海奇情,香港人少吓一個,少吓又一個。成間公司,由以前講英文,到後來講廣東話,直至最近要講普通話。有冇睇喪屍片?當身邊人逐漸變晒喪屍,自己就要諗辦法求存,尋找其他生還者。中環中產每天都活在求存的環境下,壓力唔大過學民思潮?佢哋未必會佔中,反而會繼續諗計,點樣升得快過隔籬個北京人。

吃喝玩樂就冇中港矛盾?你以為啦。有錢人出海玩船,咁大個海,本來自由自在。但係有批內地人,特登揸隻船嚟西貢以東嘆世界。佢哋隻隻都係驅逐艦,專驅逐守規矩的船隻。有錢船長一樣鬧佢哋鬧到上天,但佢唔會佔中,佔中冇用。船長會做嘅,就係發奮練船,要快過驅逐艦。

佔中未必係多數人,但想香港似番香港嘅肯定係大多數。學民思潮代表唔到佢哋,建制入面邊個夠吉士出嚟頂,夠薑話香港要似番香港,如果有個咁嘅人,先篩後投先至無咁多人覺得有問題。正如選美會如果11號有得畀人投,就唔使大家咁勞氣啦。

沒有留言:

發佈留言