2014年8月20日星期三

真正的金融才俊 - 方卓如

2014年8月4日 - 信報

普遍香港人感覺上最好的工作就是金融才俊,在投資銀行工作,搵錢又多,全部醒醒目目,俊男美女。學歷又高,聰明伶俐,唔使點瞓。

跨界別知識夠全面

金融才俊搵到錢係因為香港窮得只剩下金融,得番呢一行有得做,其他全部瓜晒。但金融呢一行,企喺食物鏈最上面,搵錢最多的,唔係金融才俊,係個人投資者。呢類個人投資者,先至係真正嘅金融才俊。

佢哋識嘅嘢,多過任何一個投資銀行家,唔單止對條例非常熟悉,而且亦知道如何才會避過無止境的提問,可以順利過關。佢哋比投資銀行家優勝的是腦筋靈活得多,唔會讀死書,懂得變通。而佢哋嘅強項,係跨界別嘅知識範圍。專業人士通常只係顧住自己嗰瓣,好少有興趣研究吓隔離嗰位西裝友,個腦究竟諗緊乜,這亦係佢哋永遠都停留喺專業人士階段嘅原因。

金融才俊代表叻仔叻女?個人投資者的聰明才智肯定高出幾皮。佢哋站得穩食物鏈最頂的位置,當然是食得住一班幫佢做嘢的金融才俊。金融才俊每次度出的橋,背景都有唔同原因。

一係以前試過,今次將廚餘再用,慳水慳力。一係夠簡單,費事諗,亦費事煩,以免將來要解畫。個人投資者要聽得出邊句真邊句假,究竟仲有冇空間再去盡啲,只靠自己的功力水平。

外表同廠佬冇分別

但係呢啲個人投資者同金融才俊最大的分別,就係冇執得咁正。金融才俊三十幾度都係孭住件老西,個人投資者就短袖衫,凍就加件風褸。上落司機接送的Alpha,同個廠佬冇分別。你喺中環見到個大叔走來走去,你都唔知佢先係轉手賺幾億的金融才俊。

沒有留言:

發佈留言